彙整
天秤危機 ?
有句俗語說:「仗義多為屠狗輩」
我承認我對 “讀書人” 甚有偏見, 學歷越高、專業資格越多的同事 …… 越懂得如何沒有道義但專業地工作。
今天發生的事是這樣的 ~
安裝天秤是地盤工作中一件極重要的事, 屬高危類別, 各有關同事理應嚴陣以待。 因為一旦發生意外, 是可以 “死得人多” 的。
今天我們的地盤安裝天秤, 所有有關文件、施工方案、程序已於個多月前預備好。 上星期亦與判頭、工友、機械工程師、天秤供應商 … 一干有關人等開會 reconfirm 所有細節。
今朝晨早, 這台重頭戲的第一男主 (安全主任) 失蹤了 !! do~do~do 你所打的電話暫時未能接通 !!!
在我們準備報警尋人之際, 秘書告之第二男主(項目經理)已批准了安全主任今天放短週 !!
頂心杉一號(即我)立即發爛 ~~~ 有冇攪X錯 !! 明知今日裝秤走去放假 !!
而明顯地聽到我發爛的項目經理則“堅守城池” 誓不踏出房門半步, 不聞不問專心地看文件。
激到我同老總扎扎扎扎跳 ……… 臨時臨急“碌爆友情咭”搵附近地盤的安全主任(老友) 飛的過來頂檔。
第一天工作差不多完成, 在一眾工友落力工作、配角(老總&me) + 臨時替更(Tim) 幫忙下總算無驚無險。
第一第二男主角, 你地好野 !!
頂心杉之練成
雖然我份人平時尚算平和, 然而在工作場所我卻需要十分燥底
看倌或許以為我是說打地盤工十分勞氣, 實情剛剛相反 ……… 「真.地盤佬」們雖然說話大聲(or 媽媽聲)、內容粗鄙, 但他們通常都是有禮貌、講道理的粗人。
反而回到寫字樓, 面對一眾「高級.衣冠禽獸」…… 情況當然不一樣
因為近年經常要擔任「頂心杉」一職, 所以略有心得,
成功的頂心杉, 除了頂心頂肺外, 還需顧及自身安全; 能攻守兼備才是 「上杉」
條件1) 自身經濟環境理想, 不用為五斗米折腰(即打風流工)者, 絕對是最可怕的下屬「上上杉」的材料。
如不,
條件2) 上司是個明白事理的人, 能接受批評 (國家級稀有動物), 且欣賞你的能力 ….. 那當然可以直話直說, 做條「好杉」
如不,
條件3) 你自己擁有不易被取代的能力 / 價值
以及,
條件4) 上司屬腦殘的級別(即腦細), 仍要看清他的實力。 官階比你高不一定等於有能力炒你 (如那些人工高能力低, 現在自身難保的中層管理人); 反之, 官階低的卻可能臥虎藏龍 (大內密探往往是不起眼的茶水亞姐、秘書仔等)
以及,
條件5) 腦細屬 “抵頂” 之人 (地盤佬用語是 “抵小” ) ~ 有些惹人討厭的性格, 如自私、孤寒、口賤、冇信用 … etc 是 “乞人憎” 但並不 “抵頂” 和此等小人頂撞, 逞一時之勇並沒有太大益處, 且將來他們定會用 hard time 回敬你的。
但面對 卸膊友、蕉皮黨、無理要求人 … 等就要“局頂”, 若不適當地定期 “還拖”, 以擺出「我非善類、絕不好惹」姿態 (雖然仍要付上代價), 他們除了得寸進尺以外, 將來有任何穫氣、凶險 … 就會把你選為首席羔羊 !!
還有最後一句 「是,就說是;不是,就說不是;若再多說,就是出於那惡者。」(太5:37)
頂還頂, 先要確保自己沒有理虧。
講完廢話 ~ 哈 ~ 夠鐘放工
Fax 屎
這是2007年8月29日的記錄
今朝, 腦細有一份很重要的文件要fax俾某公司 (內容連抬頭& fax no.都是他親筆寫的), 他亦紆尊降貴親身到fax機前按fax no.
可惜, 某公司好奇怪, 成朝都 “打唔通”
飯後, 腦細叫秘書幫佢fax好這份重要文件 …… 秘書先用 “Re-dial” 功能重fax >> 2小時過後 >> 依然 “打唔通”。 秘書再依照腦細親筆寫的fax no.再試 >> 又過多2小時,都係 “打唔通”…… 點解呢 ????
秘書細心追查事情始末,發現 >> 腦細一開始“親筆寫的&親手按的fax no.” 就是我們自己office 的 fax no……
所以,fax 左成日都 “打唔通”,而我地亦全日都收唔到任何一張fax
我冇改密碼
現在已經到了web2.0的世代 (雖然我都未知咩叫web2.0), 連地盤佬都要與時並進 >>
施工用的圖則、相關文件都開始用網絡傳送 (即每個project都有一個特定的網上database, 各相關公司、業主顧問等都可以在server上收/發資料) 非常方便 ^.^
可惜 “腦細” 係上一代的人, 不太擅長網上的運作 (我需要澄清, 佢絕對唔係唔識, 只係唔擅長), 所以佢一早將佢既 login & password 俾左我, 等我可以定時幫佢check / download有關文件。
有一日, 腦細話有份新到文件, 叫我上server download 落黎俾佢睇睇.
上到網, 但login 唔到
我問:「腦細 ~ 你改左password 呀 ??」
腦細:「 冇呀 ~~ 」(隨即走開左冇再理我….)
第二日腦細又問我download 左份文件未, 我再上又係login唔到….
再問多佢一次:「腦細 ~ 你係咪改左password 呀 ??」
腦細 (好似唔係好信我咁) 走埋黎:「 冇呀 ~~ 」
咁我唯有當面試俾佢睇 (例如佢密碼係a123456) 當然都係login唔到啦
腦細:「都係123456 ~~ 將a 轉做b 咪得law !!」
當時 >> 我除左 “啤一聲” 之外, 真係冇野好講 ~~
天氣太熱
話說有報導天氣太熱, 工人接二連三中暑前 –
腦細同管工甲有以下對話:
腦細:「我發覺近期工程進度慢左好多, 你有咩解釋 !!」
管工甲(一面疑惑) :「咪同平時差唔多….」
腦細:「咩差唔多呀 – 我見到班工人3點3就坐底飲茶, 6點鐘就換衫收工 !! 咁點會唔慢呀 !!」
管工甲(更疑惑) :「佢地一向都係3點3就坐底飲茶, 6點鐘就換衫收工架」
腦細:「咁咪唔得積極law, 你去叫佢地以後直落有得飲茶, 收7點 ~~」
*** 當然, 咁冇人性o既要求, 係冇人會睬佢***
今日, 腦細同安全主任又有以下對話:
腦細:「天氣咁熱, 你地覺得班工人曉唔曉定時休息吓呢 ??」
安全主任:「做到攰 / 熱得濟班工友就會自動休息, 唔使人教……」
腦細:「 咁我地使唔使制定d安全指引, 強制佢地例如每工作2個鐘就要休息15分鐘呢 ??」
安全主任:「做到攰 / 熱得濟班工友就會自動休息, 唔使人教……唉 ~ 除非有人唔俾佢地休息啫」
相信過多幾個禮拜, 有人將 “中暑報導” 淡忘之後, 又會突然發現 “工程進度太慢”, 再次觸發與管工甲相同的對話…….
哽一隻猫
出事了, 人人自危, 亦都人性盡現 …… 其實一直都好唔想記錄這些不愉快回憶 …… 但 今日隻猫真係哽得好唔順
你怕死所以失憶唔緊要, 亦都預左有朝一日你會將一d 唔想負的責任卸在我身上 … 甚至乎你要係背後篤我, 我連自辯o既機會都冇tim … 不過
唔好以為疲勞轟炸, 將同一番說話對我講多一百次, 我就會傻仔到相信你所講o既說話好合理 & 我錯哂掛 !!!!
腦細 :「 嗰件事佢地真係同你傾過 ?」
小職員 : 「 當時你都在場一齊傾的..」
腦細 :「 係 ??!! 我冇咩印象 ….. 」
腦細 :「 我真係冇聽過有人提過嗰件事…」
腦細 :「 如果我知道嗰件事, 我一定會叫佢地咁咁咁, 而唔會好似宜家咁咁咁 」
腦細 :「 程序上係應該咁咁咁咁, 而唔係宜家咁咁咁咁 」(事後, 你講咩都得啦 !!)
腦細 :「 我覺得當時其實可以咁咁咁咁 …… 點解冇咁做呢 ?? 如果唔係, 就唔會發生今次事件」
小職員 : 「 不過我覺得嗰件事同路陷冇咩關係 」
(完全唔理小職員, 繼續扮傻) 腦細 :「 當時點解佢地唔同我講嗰件事 ?? 」
小職員 : 「 當時你都在場一齊傾的..」
腦細 :「 係 ??!! 我冇咩印象 ….. 」
腦細 :「 我真係冇聽過有人提過嗰件事…」
腦細 :「 如果我知道嗰件事, 我一定會叫佢地咁咁咁, 而唔會好似宜家咁咁咁 」
腦細 :「 程序上係應該咁咁咁咁, 而唔係宜家咁咁咁咁 」(事後, 你講咩都得啦 !!)
腦細 :「 我覺得當時其實可以咁咁咁咁 …… 點解冇咁做呢 ?? 如果唔係, 就唔會發生今次事件」
小職員 : 「 不過我覺得嗰件事同路陷冇咩關係 」
(完全唔理小職員, 繼續扮傻) 腦細 :「 當時點解佢地唔同我講嗰件事 ?? 」
上述對話重覆左唔知幾多次…….
我唯一可以做 – 就係用堅定o既眼神 “掘”住佢, 同埋堅持我唔會哽lee隻猫
近期迴響