彙整
大聲公
總管工 亞基 出名懶到出汁, 當然 佢亦有佢既生存之道……
每逢公司有高層落黎巡視地盤, 佢都可以即刻上身 “做好呢份工”, 全程陪伴左右之餘仲講得出lee度做緊咩、嗰度做成點…..
佢對工作既 “熱誠” 大家都好佩服。 本來今次高層出巡, 佢已經攞夠分, 點知……
當成班大佬巡視完畢入會議室做例行檢討、勉勵&提點之際, 亞基竟然攞出佢收藏已久的秘密武器 – 大聲公 
然後企係會議室旁邊咆 :「亞扎鐵佬你快d戴番頂安全帽、亞釘板佬你冇戴安全帶做咩爬咁高, 亞……」
不出2分鐘, 有人走出會議室 :「亞邊個邊個, 叫出面條友唔好嘈住哂開會 !!! 」
合作無間
管工甲及管工乙管理同一區的工作, 由於他們合作無間, 令到工程 “非常順利”
話說有天早上, 管工甲指令做地渠的工友速速駕駛挖泥機(俗稱雞頭)
到A區挖地渠…
同一早上, 管工乙指令砌磚工友快快砌好A區的磚牆…
大家都冇偷懶。 終於, 到放工的時候 >> 磚牆砌好、地渠挖起 ！！
不過．．．．
部雞頭因為俾剛砌好的磚牆重重圍困，出唔返黎 
第二日， 我見到有人拆磚牆．．．．．
天氣太熱
話說有報導天氣太熱, 工人接二連三中暑前 –
腦細同管工甲有以下對話:
腦細:「我發覺近期工程進度慢左好多, 你有咩解釋 !!」
管工甲(一面疑惑) :「咪同平時差唔多….」
腦細:「咩差唔多呀 – 我見到班工人3點3就坐底飲茶, 6點鐘就換衫收工 !! 咁點會唔慢呀 !!」
管工甲(更疑惑) :「佢地一向都係3點3就坐底飲茶, 6點鐘就換衫收工架」
腦細:「咁咪唔得積極law, 你去叫佢地以後直落有得飲茶, 收7點 ~~」
*** 當然, 咁冇人性o既要求, 係冇人會睬佢***
今日, 腦細同安全主任又有以下對話:
腦細:「天氣咁熱, 你地覺得班工人曉唔曉定時休息吓呢 ??」
安全主任:「做到攰 / 熱得濟班工友就會自動休息, 唔使人教……」
腦細:「 咁我地使唔使制定d安全指引, 強制佢地例如每工作2個鐘就要休息15分鐘呢 ??」
安全主任:「做到攰 / 熱得濟班工友就會自動休息, 唔使人教……唉 ~ 除非有人唔俾佢地休息啫」
相信過多幾個禮拜, 有人將 “中暑報導” 淡忘之後, 又會突然發現 “工程進度太慢”, 再次觸發與管工甲相同的對話…….
地盤工作．搵命博
繼上個禮拜銅鑼灣 “國家級海盜” 地盤出事死兩件之後, 今次輪到巧明街亞Paul出事又死人 …….. 
咁大部天秤, 無論係掟野落黎又好、自己成部撻落黎都好 >> 你想避 ?? 其實真係冇可能 !! (所以報紙次次都係寫工人走避不及…….) 冇掟中你…只能夠話好彩 !!
依我愚見, 兩次意外相信都係人為 / 程序出錯, 出事兩間公司都係行內有名 “循規蹈矩” 之輩
。 亞Paul上年先試過成部秤撻落街 >> 死一件, 今年又黎; “國家級海盜”呢 >> 用國家級安全標準 (即祖國的標準: 視人命如草芥), 又點會唔出事丫
總括一句 : 無良承建商 妄顧安全 草菅人命
其實唔可以只怪 “無良承建商”, 班 “無良地產商” 先係幕後黑手 – 佢地不惜一切 / 威逼利誘 要求工程極速進行, 往往就係意外瀕生的原凶 !!!
至於我地班Engine, 緊守行規 – 盡量 “喱埋” 應可免一死, 不過一旦出事 都一身蟻 (根據香港法例, 梗關你事) 實先捉班Engine出黎祭旗, “無良XX” 就紛紛著草、逃之夭夭…
哽一隻猫
出事了, 人人自危, 亦都人性盡現 …… 其實一直都好唔想記錄這些不愉快回憶 …… 但 今日隻猫真係哽得好唔順
你怕死所以失憶唔緊要, 亦都預左有朝一日你會將一d 唔想負的責任卸在我身上 … 甚至乎你要係背後篤我, 我連自辯o既機會都冇tim … 不過
唔好以為疲勞轟炸, 將同一番說話對我講多一百次, 我就會傻仔到相信你所講o既說話好合理 & 我錯哂掛 !!!!
腦細 :「 嗰件事佢地真係同你傾過 ?」
小職員 : 「 當時你都在場一齊傾的..」
腦細 :「 係 ??!! 我冇咩印象 ….. 」
腦細 :「 我真係冇聽過有人提過嗰件事…」
腦細 :「 如果我知道嗰件事, 我一定會叫佢地咁咁咁, 而唔會好似宜家咁咁咁 」
腦細 :「 程序上係應該咁咁咁咁, 而唔係宜家咁咁咁咁 」(事後, 你講咩都得啦 !!)
腦細 :「 我覺得當時其實可以咁咁咁咁 …… 點解冇咁做呢 ?? 如果唔係, 就唔會發生今次事件」
小職員 : 「 不過我覺得嗰件事同路陷冇咩關係 」
(完全唔理小職員, 繼續扮傻) 腦細 :「 當時點解佢地唔同我講嗰件事 ?? 」
小職員 : 「 當時你都在場一齊傾的..」
腦細 :「 係 ??!! 我冇咩印象 ….. 」
腦細 :「 我真係冇聽過有人提過嗰件事…」
腦細 :「 如果我知道嗰件事, 我一定會叫佢地咁咁咁, 而唔會好似宜家咁咁咁 」
腦細 :「 程序上係應該咁咁咁咁, 而唔係宜家咁咁咁咁 」(事後, 你講咩都得啦 !!)
腦細 :「 我覺得當時其實可以咁咁咁咁 …… 點解冇咁做呢 ?? 如果唔係, 就唔會發生今次事件」
小職員 : 「 不過我覺得嗰件事同路陷冇咩關係 」
(完全唔理小職員, 繼續扮傻) 腦細 :「 當時點解佢地唔同我講嗰件事 ?? 」
上述對話重覆左唔知幾多次…….
我唯一可以做 – 就係用堅定o既眼神 “掘”住佢, 同埋堅持我唔會哽lee隻猫
炭燒地盤佬 
近期迴響