騙頭丙之笨賊編

這類懵丙屬史前遺物, 理應被社會淘汰, 故非常罕有 …… 俾你撞到, 都唔知係你唔好彩定係佢唔好彩

初入行的時候, 係一個位於西面起鐵路的地盤工作。其中一個巴士站上蓋的設計, 需要使用一些粗口徑、高強度的鋼鑼絲用作連接及承托, 鬼頭上司找來一個不知名騙頭丙供應這批鋼鑼絲。 貨到了, 我檢查這批材料的出廠證書(出廠證書等同材料的出世紙)時發現有問題, 這批鋼鑼絲的強度只有設計要求的一半 (即係唔夠力), 咁梗係唔掂啦, 即刻通知鬼頭上司。

鬼頭召來騙頭丙斥責一番, 要佢“攪番掂佢”……… 年少無知的我 不明所以

數日後 騙頭丙重新呈交新的“出廠證書”(先唔好追究點解會有“新的”出廠證書)。 不用細心比較也可發現“新的”出廠證書和“舊的”有99%相同, 除咗“物料強度”一欄的數值大咗 (由唔夠力變成夠力)

一睇就知lee條懵丙用塗改液改咗張證書, 然後再影印試圖瞞天過海………嘩 ~~ 當我死架 !! 盲o既都睇到啦 >>> 偽造虛假文件 >>> 犯法架 !!! 佢係咪傻架 !!!

今時今日仲有lee d 判頭 … 唉, 如果一時睇漏眼, 真係隨時俾佢害死 ~~ 監都有得坐呀

騙頭乙之奸賊編

這類騙頭最難纏＆麻煩，亦可惜因此佢地“財源廣進、長做長有”．．．．將來　仲有大把機會要同佢地“交手”

 

幾年前做一個使用“預制件施工”的私人住宅項目（預制件施工即是將一舊舊已經做好的石屎外牆組件，好似Ｌｅｇｏ咁一層層砌上去）　由於用“砌積木”方式起樓, 過程中需要大量 “臨時支撐” 去固定這些預制件, 唔好俾佢“跌落街” (每件預制件都成十噸八噸 o架, 所以唔講得少 !! )

 

其中一款“臨時支撐”是一些“預埋組件” (即預先含在石屎中, 用作固定預制件, 屬消耗品, 用一件冇一件), 選料是一個國際知名品牌, 質數有保證。

 

殊不知起到廿幾樓, 因一件小事無意中發現這些“使用中的預埋組件”同原廠貨有少少唔同 (基本上形狀&長闊高&重量完全相同, 只係色澤有少許分別) ~~ 經過仔細驗證 ~~ 嘩 A 貨當名牌 !!!

 

個死人騙頭用冒牌A貨, 我地梗係唔俾啦 …… 不過, 已經起左嗰廿幾層樓就奈佢唔何 (唔通拆樓咩) 。 點知 騙頭乙 之後仲竟然夠膽攞隻“A貨”黎做 Formal Submission (即正式呈交審批), lee d無賴睬佢都傻啦, 當然係“Reject”

 

以為事件告一段落啦, 點知好戲在後頭……我大佬冇幾耐就收到 “上頭”電話, “詢問” Reject 無賴騙頭乙的原因…對工地有咩影響云云, 然後又收到無賴騙頭乙上書, 陳述以“A貨代替名牌”的原因, 甚麼名牌供貨不穩定之類, 長此下去必定延誤…(嘩 ~ 擺明恐嚇 !!) 再交上一大疊唔知真定假的測試報告、品質證書等等, 說明國產A貨都係好野, 唔差得過國際知名品牌……

 

時下建築項目 (尤其私人住宅) 工期大過天, 佢文件齊(你又無法證實佢係假), 想拖延時間, 佢又出絕招“長此下去必定延誤”。老細唔想揹鑊, 唯有局批….唉…..

 

據知情人士透露, 其實騙頭乙從一開始已經用A貨當名牌。保守估計, 佢地因此慳左過百粒……而犧牲左質量&安全

騙頭甲之攪笑編

講開騙頭, 同佢地實在有太多 “經歷”, 有d一諗起就火都黎; 但係有d又幾攪笑…

有一次, 騙頭甲係工地做緊d佢唔應該做o既野, 我大佬行過見到當然鬧佢一餐, 然後問佢 :「邊個俾你咁做 ??」

騙頭甲 :「 我問左炭燒o架喇 !! 」

大佬梗係同我求證 :「佢話問過你bor…」

我無奈地 : 「大佬, 我明知唔可以, 又點會俾佢做呀….」

我大佬就番去質問個騙頭 :「炭燒冇話俾你做喎 !!」

騙頭甲 :「 係呀, 我問過炭燒佢話唔俾o架, 不過我照去做之ma….」

真係俾佢激死、唔知好嬲定好笑。 最後當然係制止佢……不過佢已經巧妙地用時間差「偷雞」成功, 做左唔少原本唔會俾佢做o既野…

判頭 = 騙頭

入行初期, 已經有前輩提醒我要小心班判頭(註1)……判頭 =  騙頭, 佢地講野冇句真, 信一成都死…..

註1: 判頭即分判商 / sub-contractor, 簡單而言就係我地俾錢一間工司, 聘用佢地去完成部份工程。所以一個工地可以有好多判頭。

係地盤打滾多年, 開始明白前輩的提醒、亦體會到這是一個“深層矛盾”, 佢地一定唔會同我講真說話: 「話做唔到」– 呃人 ; 「話做唔切」– 佼辯 ; 「話蝕本」  就一定係講大話 !!!

  (唔係同情佢地), 不過我明白大家身份&位置不同, (我作為Engine厘埋當然睇重工程質量&進度 / 你地做判頭就睇錢 & budget 做人)  大家各為其主….. 我明白你地為慳錢 (迫不得意 ?? !! ) 要 “出術”, 如情況許可我都唔想趕盡殺絕, 俾條生路人行吓…….但係, 你都要交足戲, 做得好好睇睇啦 !!!

Y 先生: 你用埋d下三流技倆「偷雞」錯漏百出、破綻處處, 唔拆穿你我都好難交代啫………. 唉 ~ 無謂再浪費大家時間啦

H&M 開張

今朝H&M 11am開張, 我地10:45成班同事就乘機鼠出去趁吓熱鬧, 普通多人啦…

依現場所見, 排隊o既大多係外國人

  

 

其實我對lee隻鬼佬牌子冇咩興趣 & 認識., 只係近lee個幾月係尖咀至中環地鐵站周圍都係佢d廣告同呀娜姐個樣, 都幾煩……

雖然我冇咩興趣, 但係我地5個同事落去 “趁熱鬧”, 得3個番上黎……嗰2個, 可能已經揀緊衫

人有三急

如你有幸於甲級寫字樓工作, 洗手間大多乾淨整潔、空氣清新、燈光柔和、有些更配有舒緩壓力之背景音樂, 去廁所簡直係一種享受 !! 去多幾次都絕對唔係問題, 最多都係俾人串吓 – 懶人多XX

可惜對地盤佬就冇咁好彩………遇著人有三急, 有時都幾頭痛

工地最常見, 就你lee種膠廁所……

注意: 相中所見lee幾個係新o既, 用緊嗰d絕對冇咁乾淨 !! 你又可能係郊野公園 or 環球嘉年華之類的地方見過相類似的膠廁所, 不過, 基於擺放地點、使用率 & 使用者的不同, “它”的威力係絕對不能相提並論 !!

首先, 未計因使用不當、缺乏維修、清潔而引致經常「淤塞」、「出界」、「常滿」、「冇水沖廁」等基本問題外…

這種 “膠廁” 還擁有可比美 “陶士密實袋” 的不透氣功能。 大熱天時, “它”總勇敢地屹立於工地中 – 暴曬, 基於空氣遇熱會澎脹的物理………. 當你一打開門 嘩 一股“熱”氣流兜口兜面湧埋黎, 簡直係 “芳香撲鼻” 呀 !! 身子差d肯定會即刻暈低……

就算你捱過第一關, 仲有第二關: “膠廁”內的氧含量極低、通常只夠一個正常人維持3分鐘……開細 ~ 還勉強可以, 過大 ~ 則要冒隨時缺氧昏迷之險……. 如遇正你肚潟 ~~ God bless

最後, “它”雖然勇敢地 “屹立” 但並非 “不倒”, 工地中各種大型車輛 (如泥頭車、挖泥機(俗稱雞頭)、吊機) 橫衝直撞……我已不只一之目擊這種膠廁被大車撞倒 & 翻滾, 工地不一定平坦, 「如廁中」被撞隨時會連人帶廁 “sir” 落斜路 / 斜坡, 到時真係唔死都一身 SSS